Altjóða yrkingadagur:
Eg elski bøkur

Í dag er altjóða yrkingadagur. Tað vilja vit hátíðarhalda við at endurgeva yrkingina "Eg elski bøkur" eftir Bubbi, og sum Martin Næs hevur týtt úr íslendskum.

"Eg elski bøkur" var týdd til føroyskt í 2003 og er soljóðandi:

eg elski bøkur

sum málningar og litir orðini tey koma

móðurleysar stavir í fostur eg tók

bókin er gandur sum tíðina fjalir

hugflog títt mennist við at kaga í bók

bókin er og verður tín vinur

bókin er sum leskandi løkur

so satt sum tað er sagt

jú, eg teski tað, eg teski

at eg elski bøkur

vist var lívið fátækt, var her eingin pennur

okkum orð og bøkur ella kvæði gav

jú, vist var lívið syrgiligt, var her bara sjónvarp

sigling um andans víða úthav

bókin er og verður tín vinur

bókin er sum leskandi løkur

so satt sum tað er sagt

jú, eg teski tað, eg teski

at eg elski bøkur

- endurgivin við loyvi úr Við sjógvin - týddar yrkingar og týddir sangir eftir Martin Næs. Sprotin gav savnið út í 2021. Í savninum eru yrkingar eftir norðurlendskar høvundar og sangskrivarar at finna, sum Martin Næs hevur týtt gjøgnum árini.